短打（三）

寫得太多思想（尤其通通都是感情、寂寞等話題），再寫下去，不悶死人也悶壞自己。
還是見好就收，來點生活。

1. 清明節正日，在睡不夠五小時的情況下，要拜外公，十級渴睡。理所當然遲大到。（這是我一家的遺傳，除了老豆。一家-老豆=阿媽+仔，所以遲到的壞習慣，實際只是我跟阿媽才有）上山之際，看到迎面是外婆一家正在落斜路。今次真係遲得離譜o左少少......最後我同老媽上去，裝o左一注清香。外公，最緊要有心o者，你唔介意呵？sorry :-P。

2. 同日基本上係家庭日——即係Hea。拜完山飲茶時同阿姨講起今年想去西藏，點知畀佢大返轉頭：「我地九月去新疆，你o黎唔o黎？」去新疆呢就唔係唔夠薑，係唔夠錢同假期o者，望住呢對旅行夫妻，真係......

我阿姨同姨丈，的確係我識得的人之中，旅行界別的傳奇人物。因為旅行而認識、拍拖、最後結埋婚，以佢地咁多年旅行的使費，相信生多三個來養都仲會有突。要講佢地的故仔，會好鬼長，都係講住咁多，釣o下你地癮先。其實我兩個舅父去旅行都去得好勁，我都非常好（可惜細個亦非常莫財）又唔見我阿媽係旅行迷，真係怪。

3. 都係清明節。今次要特別提o下阿Yan。（我都知你有睇呢度的） Yan係返上一份工識的part-time同事，非常之好傾同鍾意食，以前每個星期六都會搵佢食飯，然後係咁傾係咁傾，傾到佢真係放完飯要返去為止，都雞啄唔斷。但自從小弟返明記之後就好耐無見過，難得放日假，當然順道去德福探個班，再遊地鐵河送埋你返去又點話。
講真，你肥o左少少啦（又無你講得咁嚴重），但照你咁忙法，過多個零月就瘦返唔止啦，同埋我始終都係覺得你以前太瘦，肥多DD先好睇嘛。

4. 昨天凌晨，開了DVD機播李傳韻的《弦嗚》，聽著看著，直到晨光初露。

我不否認當初喜歡李傳韻，是因為發覺他跟自己很像：同樣一個胖小子、都是1980年出生、有過強的表演能量、不大適應社會、理想第一、有熱情、不拘小節，同時不修邊幅。
當然有更多的，只是自己一廂情願的投射。至少，我沒有他在音樂的天資、毅力和專注。

作為樂迷，要為他爭鳴一句：李傳韻，不是只有技術而沒有感情的拉小提琴機器，表演時不是一定要面部肌肉抽搐，才是好的演奏家；他的感情或許不會深邃如海，但這個25歲的大男孩，他很努力將感情都灌注到每首歌曲裡面。請用心聽他的音樂，不要只是看著他的臉，要不，你會錯過太多。